ဟော်မုဇ်ရေလက်ကြားက သင်္ဘောတွေကို လမ်းပြပေးမယ့် ထရမ့်ရဲ့ “ Project Freedom” အစီအစဉ် ဈေးကွက်ကို မလှုပ်ခတ်နိုင်ဘဲ ရေနံဈေး ဆက်ငြိမ်နေ

မေ ၄ ရက်၊ ၂၀၂၆ ခုနှစ် | Burma Independent Voice

အမေရိကန်သမ္မတ ဒေါ်နယ်ထရမ့်က “ Project Freedom” ဆိုတဲ့ အစီအစဉ်နဲ့ ဟော်မုဇ်ရေလက်ကြားမှာ ပိတ်မိနေတဲ့ သင်္ဘောတွေကို လမ်းပြပေးမယ်လို့ ကြေညာလိုက်ပေမယ့် ကမ္ဘာ့ရေနံဈေးကွက်မှာတော့ ဘာမှထူးမခြားနားဘဲ ဈေးနှုန်းတွေ တန့်နေပါတယ်။

ဒီနေ့ (တနင်္လာနေ့) မနက်ပိုင်း ဈေးကွက်ဖွင့်ချိန်မှာ နိုင်ငံတကာစံနှုန်းဖြစ်တဲ့ ဘရန့် (Brent) ရေနံစိမ်းဈေးဟာ တစ်စည်ကို ၁၀၈.၁၁ ဒေါ်လာမှာပဲ ရှိနေပြီး ဈေးနှုန်းအတက်အကျ မရှိသလောက်ပါပဲ။ ရေနံကုန်သည်တွေကတော့ သမိုင်းမှာ အကြီးမားဆုံးဖြစ်နေတဲ့ ဒီစွမ်းအင်ပြတ်တောက်မှု ပြဿနာကို သမ္မတထရမ့်ရဲ့ အစီအစဉ်က တကယ်ဖြေရှင်းနိုင်ပါ့မလားဆိုတာ သံသယရှိနေကြပါတယ်။

သမ္မတထရမ့်က ပိတ်မိနေတဲ့ သင်္ဘောတွေကို ကူညီပေးမယ်လို့ တနင်္ဂနွေနေ့က ပြောခဲ့ပေမယ့် အမေရိကန် ရေတပ်က ဝန်းရံစောင့်ကြပ်ပေးမှာလားဆိုတဲ့ အသေးစိတ်ကိုတော့ မပြောသေးပါဘူး။ တဖက်မှာလည်း အီရန်ဘက်က ဒီအစီအစဉ်ကို ပူးပေါင်းမှာမဟုတ်ဘူးလို့ အရိပ်အယောင်ပြနေပါတယ်။ အီရန်လွှတ်တော် အမျိုးသားလုံခြုံရေးကော်မရှင် အကြီးအကဲ အီဘရာဟင် အာဇီဇီကတော့ “ အမေရိကန်က ဝင်စွက်ဖက်ရင် အခုရှိနေတဲ့ အပစ်အခတ်ရပ်စဲရေးကို ချိုးဖောက်တာလို့ မှတ်ယူမယ်” ဆိုပြီး ပြတ်ပြတ်သားသား သတိပေးထားပါတယ်။

စင်ကာပူအခြေစိုက် Sparta က ရေနံလေ့လာဆန်းစစ်သူ ဂျွန်ဂိုကတော့ “ ဟော်မုဇ်ရေလက်ကြားမှာ ရေနံတွေ ပုံမှန်ပြန်စီးဆင်းဖို့ဆိုတာ Project Freedom ထက် ပိုသေချာတဲ့ အစီအစဉ်တွေ လိုပါတယ်။ အခုပြတ်တောက်သွားတဲ့ ရေနံထောက်ပံ့မှုတွေ ပြန်ပြည့်ဖို့ဆိုတာ လပေါင်းများစွာ ကြာနိုင်ပါတယ်” လို့ သုံးသပ်ထားပါတယ်။

ပြီးခဲ့တဲ့ ဖေဖော်ဝါရီလကတည်းက စတင်ခဲ့တဲ့ စစ်ပွဲကြောင့် ရေနံဈေးဟာ ၅၀ ရာခိုင်နှုန်းလောက်အထိ တက်နေတာပါ။ ကမ္ဘာ့ရေနံထောက်ပံ့မှုရဲ့ ၅ ပုံ ၁ ပုံလောက် စီးဆင်းနေတဲ့ ဒီရေလက်ကြား ပိတ်ဆို့နေတာကြောင့် တစ်နေ့ကို ရေနံစည်ပေါင်း ၁၄.၅ သန်းလောက် ထုတ်လုပ်မှု လျော့ကျနေတယ်လို့ Goldman Sachs ရဲ့ ခန့်မှန်းချက်တွေအရ သိရပါတယ်။

BIV သည် လွတ်လပ်၍ အမှီခိုကင်းသော သတင်းမီဒီယာဖြစ်ပြီး၊ လူ့အခွင့်အရေး၊ တရားမျှတမှု နှင့် ဒီမိုကရေစီ စံတန်ဖိုးများအပေါ် သတင်းစာကျင့်ဝတ်ဖြင့် ရပ်တည်ပါသည်။ BIV ရှင်သန်ရေးအတွက် စာဖတ်သူများ၏ အကူအညီ လိုအပ်ပါသည်။ BIV is an independent media outlet committed to human rights, justice, and democratic values, guided by the highest standards of journalistic ethics. We need your support to sustain our mission.

ဒီမှာ ကူညီပါ SUPPORT HERE