ဥရောပရှိ အမေရိကန်တပ်ဖွဲ့ဝင်အရေအတွက်ကို ထရမ့် လျှော့ချနေပြီဖြစ်ကြောင်း သတင်းထွက်ပေါ်

မေလ ၁၅ ရက်၊ ၂၀၂၆ ခုနှစ် | Burma Independent Voice

ဥရောပမဟာမိတ်နိုင်ငံတွေရဲ့ ပံ့ပိုးကူညီမှုအပေါ် သမ္မတ ဒေါ်နယ်ထရမ့်က ဝေဖန်ပြစ်တင်ခဲ့ပြီးနောက်မှာ အမေရိကန် ကာကွယ်ရေးဝန်ကြီး ပိထ် ဟက်ဂ်ဆက်  က ဥရောပသို့ တပ်ဖြန့်ထားမှု နှစ်ခုကို ရုတ်တရက် ဖျက်သိမ်းလိုက်ပြီး တပ်ဖွဲ့ဝင်အချို့ကို ပြန်လည်ရုပ်သိမ်းဖို့ ညွှန်ကြားလိုက်ပါတယ်။

ကာကွယ်ရေးဝန်ကြီးဌာနရဲ့ ထုတ်ပြန်ချက်အရ ပိုလန်၊ ရိုမေးနီးယားနဲ့ ဘောလ်တစ်နိုင်ငံတွေမှာ အလှည့်ကျတာဝန်ယူရမယ့် “ ၁၂ ကြိမ်မြောက် သံချပ်ကာ တိုက်ခိုက်ရေး တပ်မဟာ” ရဲ့ ခရီးစဉ်ကို ရပ်ဆိုင်းလိုက်တာဖြစ်ပါတယ်။ အဲဒီတပ်မဟာက တပ်ဖွဲ့ဝင်အချို့ဟာ ဥရောပကို ရောက်ရှိနေပြီဖြစ်ပေမဲ့ အခုတော့ အမေရိကန်ကို ပြန်လည်ဆုတ်ခွာကြရတော့မှာပါ။ ဒါ့အပြင် ဂျာမနီမှာ အခြေစိုက်မယ့် တာဝေးပစ်ဒုံးကျည်တပ်ရင်းတစ်ခုရဲ့ အစီအစဉ်ကိုလည်း ဖျက်သိမ်းလိုက်ပါတယ်။

ဒီအပြောင်းအလဲဟာ ဂျာမနီဝန်ကြီးချုပ် ဖရိုင်းဒရစ် မာ့ဇ် က “ အမေရိကန်ဟာ အီရန်ရဲ့ အရှက်ခွဲတာကို ခံနေရတယ်” လို့ ပြောဆိုခဲ့မှုအပေါ် ထရမ့်က မကျေမနပ်ဖြစ်ပြီးနောက်မှာ ပေါ်ပေါက်လာတာပါ။ ပင်တဂွန် ပြောရေးဆိုခွင့်ရှိသူ ရှောင် ပါနယ် ကလည်း ဂျာမနီကနေ တပ်ဖွဲ့ဝင် ၅,၀၀၀ ခန့်ကို ရုပ်သိမ်းမယ်လို့ မေလ ၁ ရက်နေ့မှာ ကြေညာထားပါတယ်။

အမေရိကန် ကာကွယ်ရေးဝန်ကြီးဌာနရဲ့ မှတ်ချက်တွေအရ ဥရောပနိုင်ငံတွေ၊ အထူးသဖြင့် ဂျာမနီဟာ “ အမေရိကန်က လိုအပ်နေချိန်မှာ တာဝန်ယူမှု မရှိခဲ့ဘူး” လို့ ဖော်ပြထားပါတယ်။ သမ္မတအနေနဲ့ ဒီလို အကျိုးမရှိတဲ့ မှတ်ချက်တွေအပေါ် တုံ့ပြန်တာဟာ မှန်ကန်ကြောင်းနဲ့ ဂျာမနီအပါအဝင် မဟာမိတ်တွေဟာ ဥရောပရဲ့ ကာကွယ်ရေးအတွက် အဓိကတာဝန်ယူသင့်တယ်လို့ ဆိုပါတယ်။

အခုလို တပ်ဖွဲ့ဝင်တွေ လျှော့ချမယ့်အစီအစဉ်အပေါ် အမေရိကန် လွှတ်တော်အမတ်အချို့ကတော့ စိုးရိမ်ပူပန်နေကြပါတယ်။ ဒီလုပ်ရပ်ဟာ ရုရှား၊ တရုတ်နဲ့ အီရန်တို့ကို မှားယွင်းတဲ့ အချက်ပြမှုမျိုး ပေးလိုက်သလို ဖြစ်နေတယ်လို့ ဒီမိုကရက်တစ် အထက်လွှတ်တော်အမတ် ဂျီးန် ရှာဟင်း က ဝေဖန်ခဲ့ပါတယ်။

အမေရိကန် စစ်ဘက်အရာရှိကြီးတွေကတော့ ယူကရိန်းစစ်ပွဲမှာ အထိနာခဲ့ပေမဲ့လည်း ရုရှားဟာ အမေရိကန်နဲ့ ဥရောပမဟာမိတ်တွေအတွက် နျူကလီးယားလက်နက်အပါအဝင် အင်အားကြီးတဲ့ ခြိမ်းခြောက်မှုတစ်ခုအဖြစ် ဆက်ရှိနေဆဲဖြစ်ကြောင်း သတိပေးထားပါတယ်။ ၂၀၂၅ ခုနှစ်စာရင်းအရ ဥရောပတစ်ခွင်မှာ အမေရိကန်တပ်ဖွဲ့ဝင် စုစုပေါင်း ၈၀,၀၀၀ ခန့် ရှိနေတာ ဖြစ်ပါတယ်

BIV သည် လွတ်လပ်၍ အမှီခိုကင်းသော သတင်းမီဒီယာဖြစ်ပြီး၊ လူ့အခွင့်အရေး၊ တရားမျှတမှု နှင့် ဒီမိုကရေစီ စံတန်ဖိုးများအပေါ် သတင်းစာကျင့်ဝတ်ဖြင့် ရပ်တည်ပါသည်။ BIV ရှင်သန်ရေးအတွက် စာဖတ်သူများ၏ အကူအညီ လိုအပ်ပါသည်။ BIV is an independent media outlet committed to human rights, justice, and democratic values, guided by the highest standards of journalistic ethics. We need your support to sustain our mission.

ဒီမှာ ကူညီပါ SUPPORT HERE