ရိုဟင်ဂျာအရပ်သားတွေကို AA က အစုလိုက်အပြုံလိုက် သတ်ဖြတ်ခဲ့တဲ့ သက်သေအထောက်အထားအသစ်တွေထွက်ပေါ်လာတယ်လို့ Fortify Rights ပြော

၂၀၂၆ ခုနှစ်၊ ဧပြီလ ၁၀ ရက် | Burma Independent Voice

ရခိုင်ပြည်နယ်အတွင်းက ရိုဟင်ဂျာအရပ်သားတွေအပေါ်မှာ အာရက္ခတပ်တော်(AA)က အစုလိုက်အပြုံလိုက် သတ်ဖြတ်မှု ကျူးလွန်ခဲ့တဲ့ သက်သေအထောက်အထားသစ်တွေကို အခြေခံပြီိးနိုင်ငံတကာရာဇဝတ်ခုံရုံး (ICC) အနေနဲ့ မြန်မာနိုင်ငံဆိုင်ရာ စုံစမ်းစစ်ဆေးမှုတွေကို တိုးချဲ့ဆောင်ရွက် သင့်တယ်လို့ Fortify Rights အဖွဲ့က ဧပြီလ ၉ ရက်နေ့မှာ ထုတ်ပြန်တောင်းဆိုလိုက်ပါတယ်။

၂၀၂၄ ခုနှစ်၊ မေလ ၂ ရက်နေ့က ဘူးသီးတောင်မြို့နယ်၊ ထန်ရှောက်ခန် ကျေးရွာအနီးမှာ AA က ကျေးရွာသားတွေကို ဘေးလွတ်ရာသို့ တိမ်းရှောင်ဖို့ အမိန့်ပေးခဲ့ပြီးနောက်၊ တိမ်းရှောင်လာသတဲ့ ရိုဟင်ဂျာအရပ်သား ရာပေါင်းများစွာကို လမ်းခုလတ်မှာ တားဆီးပြီး သေနတ်နဲ့ ပစ်ခတ်သတ်ဖြတ်ခဲ့တာဖြစ်တယ်လို့ Fortify Rights ထုတ်ပြန်ချက်မှာ ဖော်ပြပါတယ်။ Fortify Rights အဖွဲ့က အဲ့ဒီဖြစ်စဥ်က လွတ်မြောက်လာသူ (၁၅) ဦးကို ၂၀၂၅ ခုနှစ် မတ်လနဲ့ နိုဝင်ဘာလအတွင်း တွေ့ဆုံမေးမြန်းခဲ့ပြီး စိတ်မချမ်းမြေ့ဖွယ်ရာအချက်အလက်တွေကို ရရှိခဲ့တယ်လို့ ဆိုပါတယ်။

“ အားလုံးကို သတ်ပစ်လိုက်” လို့ရခိုင်ဘာသာစကားနဲ့ ဝေါ်ကီတော်ကီကတဆင့် အမိန့်ပေးသံကြားပြီးနောက် AA တပ်ဖွဲ့ဝင်တွေကသေနတ်နဲ့ အဆက်မပြတ် ပစ်ခတ်ခဲ့ပြီးသူရဲ့ မိသားစုဝင် ၉ ဦးထဲက ၇ ဦး သတ်ဖြတ်ခံခဲ့ရတယ်လို့ အသက် ၂၇ နှစ်အရွယ် Rashid Ahmed ရဲ့ ပြောကြားချက်ကို ဖော်ပြထားပါတယ်။

ကျူးလွန်ခံသူ ရာဟီးမားကလည်း သူမဟာ သေနတ်ဒဏ်ရာ ၄ ချက်ရရှိခဲ့ပေမယ့်လည်းသေဟန်ဆောင်ပြီး လွတ်မြောက်ခဲ့တာလို့ ဆိုပါတယ်။သူမရဲ့ သားသမီး ၆ ဦးလုံး သေဆုံးခဲ့တယ်လို့ထွက်ဆိုကြောင်းလည်း ထည့်သွင်းထားပါတယ်။တခြား သက်သေတွေ ဖြစ်တဲ့ အသက် ၃၈ နှစ်အရွယ် Arof ကလည်း တိမ်းရှောင်စဉ်အတွင်း အလောင်း ၄၀ ခန့်ကို တွေ့ရှိခဲ့တာနဲ့ AA က ကျေးရွာအတွင်း ပြန်လည်ဝင်ရောက်ခွင့်ကို ပိတ်ပင်ပြီး အနီိရောင်နယ်မြေအဖြစ် သတ်မှတ်ထားတယ်လို့ ဆိုပါတယ်။

AA အနေနဲ့ ရိုဟင်ဂျာတွေ အပေါ် မတရားဖမ်းဆီးတာညှင်းပန်းနှိပ်စက်တာ၊ နေအိမ်တွေကို မီးရှို့တာနဲ့ ၂၀၂၄ သြဂုတ်လမှာ မောင်တောမြိုမှာ ဖြစ်ပွားခဲ့တဲ့ အခြားသော အစုလိုက်အပြုံလိုက် သတ်ဖြတ်မှုတွေကိုလည်း ကျူးလွန်ခဲ့တယ်လို့ Fortify Rights က စွပ်စွဲထားပါတယ်။ရိုဟင်ဂျာတွေဟာ AA ရဲ့ ညှင်းပန်းနှိပ်စက်မှုကြောင့်ဘင်္ဂလားဒေ့ရှ်နိုင်ငံကို ထပ်မံထွက်ပြေးနေရတာကြောင့် ICC ရဲ့ စီရင်ပိုင်ခွင့်အတွင်း အကျုံးဝင်ကြောင်းနဲ့ AA ရဲ့ ရာဇဝတ်မှုတွေ ကိုပါ စုံစမ်းစစ်ဆေးဖို့ Fortify Rights က တောင်းဆိုထားပါတယ်။

ကုလသမဂ္ဂ အဖွဲ့ဝင်နိုင်ငံတွေ အနေနဲ့လည်း လူ့အခွင့်အရေး ချိုးဖောက်မှုတွေမှာ ပါဝင်ပတ်သက်နေတဲ့ AA နဲ့ သူတို့ရဲ့တပ်မှူးတွေကို ထိရောက်တဲ့ စီးပွားရေးပိတ်ဆို့မှုတွေ အမြန်ဆုံး ဆောင်ရွက်ဖို့လည်း တောင်းဆိုထားတာတွေ့ရပါတယ်။

BIV သည် လွတ်လပ်၍ အမှီခိုကင်းသော သတင်းမီဒီယာဖြစ်ပြီး၊ လူ့အခွင့်အရေး၊ တရားမျှတမှု နှင့် ဒီမိုကရေစီ စံတန်ဖိုးများအပေါ် သတင်းစာကျင့်ဝတ်ဖြင့် ရပ်တည်ပါသည်။ BIV ရှင်သန်ရေးအတွက် စာဖတ်သူများ၏ အကူအညီ လိုအပ်ပါသည်။ BIV is an independent media outlet committed to human rights, justice, and democratic values, guided by the highest standards of journalistic ethics. We need your support to sustain our mission.

ဒီမှာ ကူညီပါ SUPPORT HERE