ဇွန် ၃၀ ရက်၊ ၂၀၂၆ ခုနှစ် | Burma Independent Voice

ရုရှားနိုင်ငံအနှံ့အပြားကို ညအမှောင်ကိုအသုံးပြုပြီး အလုံးအရင်းဖြင့် ဝင်ရောက်တိုက်ခိုက်လာတဲ့ ယူကရိန်းနိုင်ငံရဲ့ ဒရုန်း စုစုပေါင်း ၄၁၉ စင်းကို တစ်ညတာအတွင်း ပစ်ခတ်ချေမှုန်းနိုင်ခဲ့ကြောင်း ရုရှားကာကွယ်ရေးဝန်ကြီးဌာနက ယနေ့ (အင်္ဂါနေ့) တွင် သတင်းထုတ်ပြန်လိုက်ပါတယ်။

၅ နှစ်ထဲသို့ ချဉ်းနင်းဝင်ရောက်လာပြီဖြစ်တဲ့ ရုရှား-ယူကရိန်း စစ်ပွဲအတွင်း ယူကရိန်းဘက်က ရုရှားနိုင်ငံရဲ့ စစ်စရိတ်ရှာဖွေရာ အဓိကဝင်ငွေအရင်းအမြစ်ဖြစ်တဲ့ စွမ်းအင်ဆိုင်ရာ အခြေခံအဆောက်အအုံတွေကို ပစ်မှတ်ထားပြီး မိုင်ပေါင်းများစွာအကွာအဝေးအထိ ပျံသန်းနိုင်တဲ့ ဒရုန်းတိုက်ခိုက်မှုလှိုင်းတွေကို လတ်တလောလပိုင်းအတွင်း အရှိန်မြှင့်တင် လုပ်ဆောင်လာတာ ဖြစ်ပါတယ်။ အခုပစ်ချခံရတာတွေကြောင့် လူသေဆုံးမှု သို့မဟုတ် ထိခိုက်ဒဏ်ရာရရှိမှု ရှိ၊ မရှိကိုတော့ ရုရှားကာကွယ်ရေးဝန်ကြီးဌာနရဲ့ ထုတ်ပြန်ချက်မှာ အသေးစိတ် ဖော်ပြထားခြင်း မရှိပါဘူး။

မော်စကိုမြို့တော်ဝန် ဆာဂေး ဆိုဗျာနင် (Sergey Sobyanin) ရဲ့ ကနဦးထုတ်ပြန်ချက်အရ ညဉ့်နက်ပိုင်းက မြို့တော်မော်စကိုဆီသို့ ဦးတည်ပျံသန်းလာတဲ့ ရန်သူ့ဒရုန်း အစင်းရေ ၅၀ ခန့်ကို ရုရှားရဲ့ လေကြောင်းရန်ကာကွယ်ရေးစနစ်တွေက ကြားဖြတ်ပစ်ချနိုင်ခဲ့တယ်လို့ ဆိုပါတယ်။

ပြီးခဲ့တဲ့ သီတင်းပတ်ကလည်း ယူကရိန်းရဲ့ ဒရုန်းတိုက်ခိုက်မှုကြောင့် မော်စကိုမြို့ အရှေ့တောင်ပိုင်းရှိ ရေနံချက်စက်ရုံတစ်ခုမှာ အကြီးအကျယ် မီးလောင်ကျွမ်းမှု ဖြစ်ပွားခဲ့ဖူးပါတယ်။

အခု တနင်္လာနေ့ညပိုင်း တိုက်ခိုက်မှုဟာ ပြီးခဲ့တဲ့ ကြာသပတေးနေ့နဲ့ သောကြာနေ့တို့က ယူကရိန်းဘက်က ဒရုန်းအစင်းရေ ၆၆၀ အထိ အသုံးပြုပြီး စစ်ပွဲသမိုင်းတစ်လျှောက် အကြီးမားဆုံး ဒရုန်းစစ်ဆင်ရေးကို ဆင်နွှဲခဲ့ပြီးနောက် ရက်ပိုင်းအကြာမှာပဲ ထပ်မံပေါ်ပေါက်လာတာ ဖြစ်ပါတယ်။

ယူကရိန်းဟာ အနောက်အုပ်စုရဲ့ ကန့်သတ်ချက်တွေကြောင့် ရုရှားပြည်တွင်းသို့ ရေရှည်ပစ်ဒုံးကျည်များဖြင့် လွတ်လပ်စွာ ပစ်ခတ်ခွင့်မရရှိသေးတဲ့အတွက်၊ မိမိကိုယ်တိုင် ထုတ်လုပ်ထားတဲ့ တာဝေးပျံသန်းနိုင်တဲ့ ဒရုန်းအုပ်စုလိုက် တိုက်ခိုက်ရေးဗျူဟာ ကို အစားထိုးပြီး ရုရှားစီးပွားရေး အချက်အချာကျတဲ့နေရာတွေကို ပိုမိုဖိအားပေး တိုက်ခိုက်လာနေတာ ဖြစ်ပါတယ်။

#burmaindependentvoice#russia#ukraine

BIV သည် လွတ်လပ်၍ အမှီခိုကင်းသော သတင်းမီဒီယာဖြစ်ပြီး၊ လူ့အခွင့်အရေး၊ တရားမျှတမှု နှင့် ဒီမိုကရေစီ စံတန်ဖိုးများအပေါ် သတင်းစာကျင့်ဝတ်ဖြင့် ရပ်တည်ပါသည်။ BIV ရှင်သန်ရေးအတွက် စာဖတ်သူများ၏ အကူအညီ လိုအပ်ပါသည်။ BIV is an independent media outlet committed to human rights, justice, and democratic values, guided by the highest standards of journalistic ethics. We need your support to sustain our mission.

ဒီမှာ ကူညီပါ SUPPORT HERE