အီရန်စစ်ပွဲရိုက်ခတ်မှုများကြားမှ ရှီကျင့်ဖျင်နှင့် တွေ့ဆုံရန် သမ္မတ ထရမ့် ဘေဂျင်းသို့ ရောက်ရှိမည်

မေလ ၁၃ ရက်၊ ၂၀၂၆ ခုနှစ် | Burma Independent Voice

အမေရိကန်သမ္မတ ဒေါ်နယ်ထရမ့်ဟာ အီရန်စစ်ပွဲကြောင့် ကျဆင်းနေတဲ့ သူ့ရဲ့သြဇာအာဏာကို ပြန်လည်ဆယ်တင်ဖို့ ကြိုးပမ်းတဲ့အနေနဲ့ ဒီကနေ့ ဗုဒ္ဓဟူးနေ့ညနေပိုင်းမှာ တရုတ်နိုင်ငံ ဘေဂျင်းမြို့ကို ရောက်ရှိလာတော့မှာ ဖြစ်ပါတယ်။ ဒါဟာ ဆယ်စုနှစ်တစ်ခုနီးပါးအတွင်း အမေရိကန်သမ္မတတစ်ဦးရဲ့ ပထမဆုံး တရုတ်နိုင်ငံ ခရီးစဉ်လည်း ဖြစ်ပါတယ်။

ဒီခရီးစဉ်မှာ ထရမ့်ဟာ တက်စလာ ပိုင်ရှင် အီလွန်မတ်စ်၊ အက်ပဲလ် အမှုဆောင်အရာရှိချုပ် တင်မ်ကွတ်တို့လို နည်းပညာလောကရဲ့ ထိပ်သီးခေါင်းဆောင်တွေကိုပါ ခေါ်ဆောင်လာခဲ့ပြီး အံ့အားသင့်စရာ ကုန်သွယ်ရေးသဘောတူညီချက်တွေ ရရှိဖို့ မျှော်လင့်နေတာပါ။ သမ္မတ ထရမ့်ကတော့ ရှီကျင့်ဖျင်နဲ့ တွေ့ဆုံတဲ့အခါ “ သူက ကျွန်တော့်ကို နွေးနွေးထွေးထွေး ကြိုဆိုလိမ့်မယ်” လို့ ယုံကြည်ချက်အပြည့်နဲ့ ပြောဆိုထားပါတယ်။

ဒါပေမဲ့ ထရမ့်ကိုယ်တိုင် စတင်ခဲ့ပြီး အဆုံးမသတ်နိုင်သေးတဲ့ အရှေ့အလယ်ပိုင်း ပဋိပက္ခဟာ ဒီဆွေးနွေးပွဲအပေါ် အရိပ်မည်းကြီးလို လွှမ်းမိုးနေပါတယ်။ အထူးသဖြင့် အီရန်အရေးမှာ တရုတ်ရဲ့ အကူအညီကို ရရှိဖို့အတွက် အမေရိကန်က ထိုင်ဝမ်အပေါ် ထားရှိတဲ့ ထောက်ခံမှုကို လျှော့ချလိုက်မှာလားဆိုတဲ့ စိုးရိမ်မှုတွေလည်း ရှိနေပါတယ်။

ထရမ့်ကတော့ “ အီရန်ကိစ္စမှာ ဘယ်သူ့အကူအညီမှ မလိုဘူး။ ငြိမ်းချမ်းစွာပဲဖြစ်ဖြစ်၊ တခြားနည်းနဲ့ပဲဖြစ်ဖြစ် ကျွန်တော်တို့ နိုင်မှာပါ” လို့ အိမ်ဖြူတော်ကနေ မထွက်ခွာခင် သတင်းထောက်တွေကို ပြောကြားခဲ့ပါတယ်။ ဒါ့အပြင် အီရန်အရေးမှာ ရှီကျင့်ဖျင်ရဲ့ သဘောထားက ကောင်းမွန်တဲ့အတွက် အခြေအနေတွေကို ထိန်းချုပ်ထားနိုင်တယ်လို့လည်း သူက ဆိုပါတယ်။

လက်ရှိမှာတော့ ဝါရှင်တန်ဟာ အီရန်ရဲ့ အဓိက ရေနံဝယ်ယူသူဖြစ်တဲ့ တရုတ်ကို အသုံးပြုပြီး ဟော်မုဇ် ရေလက်ကြား ပြန်ဖွင့်ပေးဖို့နဲ့ အီရန်အစိုးရကို ဖိအားပေးဖို့ လပေါင်းများစွာ ကြိုးပမ်းနေရတာပါ။ တစ်ဖက်မှာလည်း အီရန်ကို စစ်ရေးအရ ကူညီနေတယ်ဆိုတဲ့ စွပ်စွဲချက်နဲ့ တရုတ်ကုမ္ပဏီအချို့ကို အမေရိကန်က အရေးယူထားတာကြောင့် ဘေဂျင်းဘက်က ပြင်းပြင်းထန်ထန် ကန့်ကွက်ထားပါတယ်။

ဒီခရီးစဉ်အတွင်း ဘိုးရင်း လေယာဉ် အစီး ၅၀၀ ရောင်းချမယ့် သဘောတူညီချက်ကို ကြေညာဖို့ ရှိနေသလို၊ နှစ်နိုင်ငံ ကုန်သွယ်ရေးကို စီမံခန့်ခွဲမယ့် ဘုတ်အဖွဲ့အသစ် ဖွဲ့စည်းရေးကိုလည်း ဆွေးနွေးသွားမှာ ဖြစ်ပါတယ်။ ဒါ့အပြင် AI နည်းပညာဆိုင်ရာ ဘေးကင်းလုံခြုံရေး စံနှုန်းတွေ သတ်မှတ်ဖို့ကိုလည်း အဓိကထား ဆွေးနွေးသွားဖွယ် ရှိပါတယ်။

ဘေဂျင်းမြို့မှာတော့ သမ္မတ ထရမ့်ရဲ့ ခရီးစဉ်အတွက် လုံခြုံရေးကို အမြင့်ဆုံး တိုးမြှင့်ထားပါတယ်။ ထရမ့်ဟာ ရှီကျင့်ဖျင်နဲ့အတူ သမိုင်းဝင် ကောင်းကင်ဘုံကျောင်းတော် ဆီကို သွားရောက်လည်ပတ်မှာဖြစ်ပြီး ကြာသပတေးနေ့မှာတော့ နိုင်ငံတော်ဂုဏ်ပြုညစာစားပွဲကို တက်ရောက်သွားမှာ ဖြစ်ပါတယ်။

သုတေသနပညာရှင်အချို့ကတော့ လက်ရှိအခြေအနေမှာ အမေရိကန်ထက် တရုတ်က ပိုပြီး အသာစီးရနေတယ်လို့ သုံးသပ်ကြပါတယ်။ အကယ်၍ ဒီဆွေးနွေးပွဲမှာ ထရမ့်ဘက်က သိသာထင်ရှားတဲ့ ရလဒ်တွေ မရရှိခဲ့ဘဲ အပေးအယူတွေသာ လုပ်ခဲ့ရမယ်ဆိုရင် ဒါဟာ အမေရိကန်ရဲ့ ကမ္ဘာ့ထိပ်သီးနေရာကို တရုတ်လက်ထဲ ထိုးအပ်လိုက်သလို ဖြစ်သွားနိုင်တယ်လို့လည်း ဝေဖန်မှုတွေ ထွက်ပေါ်နေပါတယ်။

BIV သည် လွတ်လပ်၍ အမှီခိုကင်းသော သတင်းမီဒီယာဖြစ်ပြီး၊ လူ့အခွင့်အရေး၊ တရားမျှတမှု နှင့် ဒီမိုကရေစီ စံတန်ဖိုးများအပေါ် သတင်းစာကျင့်ဝတ်ဖြင့် ရပ်တည်ပါသည်။ BIV ရှင်သန်ရေးအတွက် စာဖတ်သူများ၏ အကူအညီ လိုအပ်ပါသည်။ BIV is an independent media outlet committed to human rights, justice, and democratic values, guided by the highest standards of journalistic ethics. We need your support to sustain our mission.

ဒီမှာ ကူညီပါ SUPPORT HERE