ဟန်တာဗိုင်းရပ်စ် စောင့်ကြည့်လူနာ ၂၂ ဦး ဆေးရုံမှ ဆင်းခွင့်ရတော့မည်

မေလ ၁၃ ရက်၊ ၂၀၂၆ ခုနှစ် | Burma Independent Voice

ဟန်တာဗိုင်းရပ်စ် ကူးစက်မှုဖြစ်ပွားခဲ့တဲ့ အပျော်စီးသင်္ဘောပေါ်ကနေ ဘေးလွတ်ရာကို ရွှေ့ပြောင်းပေးခဲ့ရပြီး လီပါပူးလ်မြို့ ဆေးရုံတစ်ခုမှာ သီးသန့်ခွဲခြား စောင့်ကြည့်ခံနေရသူ ၂၂ ဦးဟာ မကြာခင်မှာ ဆေးရုံကနေ ဆင်းခွင့်ရတော့မှာ ဖြစ်ပါတယ်။

MV Hondius သင်္ဘောပေါ်မှာ ပါဝင်ခဲ့တဲ့ အဲဒီခရီးသည်တွေနဲ့ သင်္ဘောသားတွေဟာ မာဆေးဆိုဒ် ရှိ Arrowe Park ဆေးရုံမှာ ၇၂ နာရီကြာ စောင့်ကြည့်ခံခဲ့ရတာဖြစ်ပြီး၊ အခုအခါမှာတော့ နေအိမ်တွေမှာ နောက်ထပ် ၄၂ ရက်ကြာ သီးသန့်ခွဲနေထိုင်ဖို့ ပြင်ဆင်နေကြပြီ ဖြစ်ပါတယ်။ သူတို့ထဲမှာ ဗြိတိန်နိုင်ငံသား ၂၀ ဦး၊ ဂျာမန်တစ်ဦးနဲ့ ဂျပန်နိုင်ငံသား တစ်ဦးတို့ ပါဝင်ပါတယ်။

ဒါ့အပြင် တောင်အတ္တလန္တိတ်သမုဒ္ဒရာအတွင်းရှိ ဗြိတိန်ပိုင်ကျွန်းစုတွေကနေ တခြားခရီးသည် ၁၀ ဦးကိုလည်း ကြိုတင်ကာကွယ်တဲ့အနေနဲ့ ဗြိတိန်နိုင်ငံဆီ ခေါ်ဆောင်လာနေပါတယ်။ ဗြိတိန်ကျန်းမာရေးဌာန (UKHSA) ကတော့ အကယ်၍ သူတို့ နေမကောင်းဖြစ်လာခဲ့ရင် အင်္ဂလန်က ကျန်းမာရေးအဖွဲ့တွေအနေနဲ့ အဆင်သင့် ကိုင်တွယ်ဖြေရှင်းနိုင်အောင် အခုလို ရွှေ့ပြောင်းရတာဖြစ်ကြောင်း ပြောကြားခဲ့ပါတယ်။

လက်ရှိ ဆေးရုံမှာရှိနေသူတွေဟာ ကျန်းမာရေးကောင်းမွန်ပြီး ရောဂါလက္ခဏာ တစ်စုံတစ်ရာ ပြသခြင်းမရှိဘူးလို့ တာဝန်ရှိသူတွေက ဆိုပါတယ်။ အခုအခါမှာ ကျန်းမာရေးပညာရှင်တွေက သူတို့အနေနဲ့ နေအိမ်တွေမှာ သီးသန့်ခွဲနေထိုင်ဖို့ သင့်တော်ခြင်း ရှိ၊ မရှိကို စစ်ဆေးအကဲဖြတ်နေကြပါတယ်။

ဒီဗိုင်းရပ်စ်ကူးစက်မှုကြောင့် အခုချိန်အထိ လူ ၃ ဦး သေဆုံးခဲ့ရပြီး နယ်သာလန် ဇနီးမောင်နှံနှစ်ဦးနဲ့ ဂျာမန်အမျိုးသမီးတစ်ဦးတို့ ဖြစ်ပါတယ်။ ကမ္ဘာ့ကျန်းမာရေးအဖွဲ့ (WHO) ညွှန်ကြားရေးမှူးချုပ် တက်ဒရော့စ်ကတော့ “ ဒါဟာ အကြီးအကျယ် ကူးစက်ပြန့်ပွားမယ့် လက္ခဏာမရှိသေးပေမဲ့ ရောဂါပိုးရှိသူတွေ ထပ်ရှိလာနိုင်သေးတာကြောင့် ထိန်းချုပ်ရေးလုပ်ငန်းတွေကို ဆက်လက်လုပ်ဆောင်သွားမယ်” လို့ ပြောကြားခဲ့ပါတယ်။

အာဂျင်တီးနားနိုင်ငံကနေ ဧပြီလ ၁ ရက်နေ့မှာ စတင်ထွက်ခွာလာခဲ့တဲ့ MV Hondius သင်္ဘောပေါ်မှာ နိုင်ငံပေါင်း ၂၈ နိုင်ငံက ခရီးသည်နဲ့ သင်္ဘောသား ၁၅၀ ခန့် ပါဝင်ခဲ့တာပါ။ လက်ရှိမှာတော့ သင်္ဘောပေါ်မှာ ကျန်ရှိနေတဲ့ ခရီးသည်အားလုံးကို နေရပ်အသီးသီးဆီ ပြန်လည်ပို့ဆောင်ပေးခဲ့ပြီးပြီ ဖြစ်ပါတယ်။ သင်္ဘောဟာ နယ်သာလန်နိုင်ငံဆီ ဦးတည်ခုတ်မောင်းနေပြီး အဲဒီမှာ သင်္ဘောသား ၂၅ ဦးနဲ့ ဆေးဘက်ဆိုင်ရာ ကျွမ်းကျင်သူ ၂ ဦး၊ ကွယ်လွန်သွားတဲ့ ဂျာမန်ခရီးသည်ရဲ့ ရုပ်အလောင်းတို့ ပါရှိသွားတယ်လို့ သိရပါတယ်။

BIV သည် လွတ်လပ်၍ အမှီခိုကင်းသော သတင်းမီဒီယာဖြစ်ပြီး၊ လူ့အခွင့်အရေး၊ တရားမျှတမှု နှင့် ဒီမိုကရေစီ စံတန်ဖိုးများအပေါ် သတင်းစာကျင့်ဝတ်ဖြင့် ရပ်တည်ပါသည်။ BIV ရှင်သန်ရေးအတွက် စာဖတ်သူများ၏ အကူအညီ လိုအပ်ပါသည်။ BIV is an independent media outlet committed to human rights, justice, and democratic values, guided by the highest standards of journalistic ethics. We need your support to sustain our mission.

ဒီမှာ ကူညီပါ SUPPORT HERE