မေ ၂၂ ရက်၊ ၂၀၂၆ ခုနှစ် | Burma Independent Voice

အမေရိကန်သမ္မတ ဒေါ်နယ်ထရမ့်ရဲ့ နာမည်ကျော် ဆံပင်ပုံစံနဲ့ ဆင်တူနေတဲ့ ရွှေရောင်ဆံပင်တွေကြောင့် “Donald Trump” လို့ နာမည်ပေးထားတဲ့ ဘင်္ဂလားဒေ့ရှ်နိုင်ငံက ကျွဲဖြူတကောင်ဟာ လူမှုကွန်ရက်ပေါ်မှာ လူကြိုက်များ ရေပန်းစားနေပြီး၊ သူ့ကို လာမယ့် Eid al-Adha (အစ်ဒ်ပွဲတော်) အတွက် ယဇ်ပူဇော် လှူဒါန်းတော့မှာဖြစ်ကြောင်း သခင်ဖြစ်သူက ထုတ်ဖော်ပြောဆိုလိုက်ပါတယ်။

ပေါင် ၁,၅၀၀ ခန့် အလေးချိန်ရှိတဲ့ အဆိုပါ ကျွဲဖြူဟာ ရှားပါးတဲ့ လူဝံဖြူ (Albino) မျိုးစိတ်တခုဖြစ်ပြီး၊ ရွှေရောင်ဆံပင်တွေကို ခေါင်းပေါ်မှာ ဖောင်းဖောင်းကြီး ဖုံးအုပ်ထားတဲ့ပုံစံက လက်ရှိ အမေရိကန်သမ္မတရဲ့ ဆံပင်ပုံစံနဲ့ အလွန်တူနေတယ်လို့ လူအများက သတ်မှတ်ကြခြင်းကြောင့် အထူးစိတ်ဝင်စား ခံနေရတာ ဖြစ်ပါတယ်။

ဘင်္ဂလားဒေ့ရှ်မြို့တော် ဒါကာအနီး နာရာယန်ဂန်ဂျ်မြို့ရှိ ၎င်းရဲ့မွေးမြူရေးခြံသို့ မေလအတွင်းမှာတင် လာရောက်ကြည့်ရှုသူ အများအပြား ရှိနေပြီး၊ အချို့ဆိုရင် အဆိုပါကျွဲဖြူကို မြင်တွေ့ရဖို့အတွက် တနာရီကြာ လှေစီးပြီး လာရောက်ခဲ့ကြရသည်အထိ စိတ်ဝင်စားမှု မြင့်တက်နေတာ ဖြစ်ပါတယ်။

အသက် ၃၈ နှစ်အရွယ် မွေးမြူရေးသမား ဇီယာ အူဒင် မရီဒါက သူ့ရဲ့ညီဖြစ်သူက ကျွဲရဲ့ “ထူးခြားတဲ့ ဆံပင်ပုံစံ” ကြောင့် အခုလို ဒေါ်နယ်ထရမ့်လို့ နာမည်ပေးခဲ့တာဖြစ်တယ်လို့ အေအက်ဖ်ပီ (AFP) သတင်းဌာနကို ပြောကြားခဲ့ပါတယ်။ လာရောက်ကြည့်ရှုသူ တဦးကလည်း “ဒီကျွဲနဲ့ သမ္မတ ဒေါ်နယ်ထရမ့်ရဲ့ ပုံစံတွေက တကယ်ကို ဆင်တူလှပါတယ်” လို့ ဆိုပါတယ်။

သို့သော်လည်း အခုလို လူကြိုက်များနေတဲ့ “Donald Trump” ကျွဲဖြူဟာ ယခုလနှောင်းပိုင်းမှာ ကျင်းပမယ့် မွတ်ဆလင်ဘာသာဝင်တွေရဲ့ Eid al-Adha ပွဲတော်မှာ ယဇ်ပူဇော်ခြင်း ခံရတော့မှာ ဖြစ်ပါတယ်။ ဒါဟာ ဘင်္ဂလားဒေ့ရှ်နိုင်ငံတဝန်းမှာ တိရစ္ဆာန် ကောင်ရေ ၁၂ သန်းခန့်အထိ သတ်ဖြတ်ယဇ်ပူဇော်မယ့် အစီအစဉ်ရဲ့ တစိတ်တပိုင်းလည်း ဖြစ်ပါတယ်။

“ဒေါ်နယ်ထရမ့်ကို ကျွန်တော် အမြဲသတိရနေမှာပါ။ ဒါပေမယ့် ဒီလိုမျိုး ပူဇော်လှူဒါန်းလိုက်ခြင်းက Eid al-Adha ပွဲတော်ရဲ့ အဓိက အနှစ်သာရပဲ ဖြစ်ပါတယ်” လို့ ကျွဲပိုင်ရှင် မရီဒါက ပြောကြားခဲ့ပါတယ်။

BIV သည် လွတ်လပ်၍ အမှီခိုကင်းသော သတင်းမီဒီယာဖြစ်ပြီး၊ လူ့အခွင့်အရေး၊ တရားမျှတမှု နှင့် ဒီမိုကရေစီ စံတန်ဖိုးများအပေါ် သတင်းစာကျင့်ဝတ်ဖြင့် ရပ်တည်ပါသည်။ BIV ရှင်သန်ရေးအတွက် စာဖတ်သူများ၏ အကူအညီ လိုအပ်ပါသည်။ BIV is an independent media outlet committed to human rights, justice, and democratic values, guided by the highest standards of journalistic ethics. We need your support to sustain our mission.

ဒီမှာ ကူညီပါ SUPPORT HERE