ဇွန် ၁၃ ရက်၊ ၂၀၂၆ ခုနှစ် | Burma Independent Voice (BIV)

အင်္ဂလန်လက်ရွေးစင်အသင်းဟာ ကန်းဆပ်စီးတီး ရှိ သူတို့ရဲ့ လေ့ကျင့်ရေးစခန်းသို့ စနေနေ့တွင် မရောက်ရှိမီ၊ အသင်း၏ ကမ္ဘာ့ဖလား ပြင်ဆင်မှုပစ္စည်းအချို့ ခိုးယူခံခဲ့ရမှုကြောင့် အခက်အခဲနှင့် ရင်ဆိုင်နေရပါတယ်။

ဘီဘီစီ (BBC) ၏ ဖော်ပြချက်အရ အင်္ဂလန်အသင်း၏ လေ့ကျင့်ရေးအခြေစိုက်စခန်းဖြစ်သော Swope Soccer Village သို့ ပစ္စည်းများ သယ်ဆောင်လာသည့် ယာဉ်များ ဖောက်ထွင်းခံခဲ့ရပြီးနောက်၊ ပျောက်ဆုံးသွားသည့် ပစ္စည်းများထဲတွင် ဘောလုံးများနှင့် ကစားသမားသုံး ဘောလုံးကန်ဖိနပ်များ ပါဝင်နေကြောင်း သိရပါတယ်။

အင်္ဂလန်ဘောလုံးအဖွဲ့ချုပ် (FA) ကလည်း ဗြိတိန်သတင်းဌာန (Press Association) သို့ အဆိုပါဖြစ်စဉ် ဖြစ်ပွားခဲ့သည်မှာ မှန်ကန်ကြောင်း အတည်ပြုခဲ့သော်လည်း၊ လက်ရှိတွင် ရဲတပ်ဖွဲ့က ကိုင်တွယ်စုံစမ်းနေသည့် ကိစ္စဖြစ်သောကြောင့် အသေးစိတ်အချက်အလက်များကို ထပ်မံထုတ်ပြန်နိုင်ခြင်း မရှိသေးပါဘူး။

မစ်ဇူရီပြည်နယ်၊ ကန်းဆပ်စီးတီး ရဲတပ်ဖွဲ့က ဒေလီမေးလ် (Daily Mail) သတင်းစာသို့ ပြောကြားရာ၌ “ ယနေ့ညနေပိုင်းက ကန်းဆပ်စီးတီးကို ရောက်ရှိလာတဲ့ အသင်းရဲ့ မော်တော်ယာဉ်တစ်စီးပေါ်ကနေ ပစ္စည်းအချို့ ပျောက်ဆုံးသွားခဲ့တဲ့ ခိုးယူမှုဖြစ်စဉ်ကို ကျွန်တော်တို့ စုံစမ်းစစ်ဆေးနေပါတယ်။ စုံစမ်းစစ်ဆေးမှုတွေကတော့ ဆက်လက်လုပ်ဆောင်နေဆဲ ဖြစ်ပါတယ်” ဟု ဆိုပါတယ်။

ဘီဘီစီ၏ ဖော်ပြချက်အရ ယခုဖြစ်စဉ်နှင့် ပတ်သက်၍ သံသယရှိသူ နှစ်ဦးကို ဖမ်းဆီးထိန်းသိမ်းထားနိုင်ခဲ့ပြီဟု သိရပါတယ်။

နည်းပြ သောမတ်စ် တူချယ်  ဦးဆောင်သည့် အင်္ဂလန်အသင်းသည် ဖလော်ရီဒါရှိ ကမ္ဘာ့ဖလားမတိုင်မီ လေ့ကျင့်ရေးစခန်းမှ ပြောင်းရွှေ့လာပြီးနောက်၊ ယနေ့စနေနေ့ တွင် Swope Soccer Village ၌ ပထမဆုံးအကြိမ် လေ့ကျင့်မှုများ ပြုလုပ်ရန် စီစဉ်ထားတာ ဖြစ်ပါတယ်။

အင်္ဂလန်အသင်းသည် လာမည့် ကြာသပတေးနေ့တွင် ခရိုအေးရှားအသင်းနှင့် ကမ္ဘာ့ဖလား အဖွင့်ပွဲစဉ်ကို စတင်ယှဉ်ပြိုင်ရမည်ဖြစ်ပြီး၊ ထို့နောက် အုပ်စု (L) အတွင်းရှိ ကျန်ပြိုင်ဘက်များဖြစ်သော ဂါနာ နှင့် ပနားမားအသင်းတို့နှင့် ဆက်လက်ယှဉ်ပြိုင်သွားရမည် ဖြစ်ကြောင်း သိရပါတယ်။

BIV သည် လွတ်လပ်၍ အမှီခိုကင်းသော သတင်းမီဒီယာဖြစ်ပြီး၊ လူ့အခွင့်အရေး၊ တရားမျှတမှု နှင့် ဒီမိုကရေစီ စံတန်ဖိုးများအပေါ် သတင်းစာကျင့်ဝတ်ဖြင့် ရပ်တည်ပါသည်။ BIV ရှင်သန်ရေးအတွက် စာဖတ်သူများ၏ အကူအညီ လိုအပ်ပါသည်။ BIV is an independent media outlet committed to human rights, justice, and democratic values, guided by the highest standards of journalistic ethics. We need your support to sustain our mission.

ဒီမှာ ကူညီပါ SUPPORT HERE