တရုတ်ခရီးစဉ်မှာ ထရမ့် “ အောင်ပွဲခံ” နေပေမဲ့ လက်တွေ့မှာတော့ ရှီကျင့်ဖျင်ရဲ့ ဟိန်းဟောက်သံနဲ့အတူ အမေရိကန် အခြေအနေမလှဖြစ်နေ

မေ ၁၅ ရက်၊ ၂၀၂၆ ခုနှစ် | Burma Independent Voice

အမေရိကန်သမ္မတ ဒေါ်နယ်ထရမ့်ဟာ တရုတ်နိုင်ငံ ပေကျင်းမြို့မှာ သမ္မတ ရှီကျင့်ဖျင်နဲ့ နှစ်ရက်ကြာ ထိပ်သီးအစည်းအဝေးအပြီး သူ့ရဲ့ခရီးစဉ်ကို အဆုံးသတ်လိုက်ပါတယ်။ ဒီခရီးစဉ်အတွင်းမှာ ထရမ့်က “ ကြီးကျယ်ခမ်းနားတဲ့” ကုန်သွယ်ရေး သဘောတူညီချက်တွေ ရခဲ့တယ်လို့ ကြွေးကြော်နေပေမဲ့ လက်တွေ့မှာတော့ ခိုင်မာတဲ့ အတည်ပြုချက်တွေထက် ရှီကျင့်ဖျင်ရဲ့ ပြင်းထန်တဲ့ သတိပေးချက်တွေအောက်မှာ ထရမ့်တယောက် နှုတ်ဆိတ်နေခဲ့ရတာကို တွေ့ရပါတယ်။

ထရမ့်က တရုတ်နိုင်ငံဟာ Boeing လေယာဉ် အစီးရေ ၂၀၀ ဝယ်ဖို့ သဘောတူလိုက်ပြီလို့ ပြောခဲ့ပေမဲ့ Boeing ကုမ္ပဏီရော တရုတ်အစိုးရဘက်ကပါ အတည်မပြုဘဲ ငြင်းဆိုထားပါတယ်။ အလားတူပဲ စိုက်ပျိုးရေးနဲ့ စွမ်းအင်ကဏ္ဍတွေမှာ ဒေါ်လာဘီလီယံ ဆယ်ဂဏန်းချီ ရောင်းချရမယ်လို့ ဆိုနေပေမဲ့ ၂၀၁၇ တုန်းကလိုပဲ “ လေထဲက ကတိတွေ” ဖြစ်နေမလားဆိုတာ စီးပွားရေးပညာရှင်တွေက သံသယဖြစ်နေကြပါတယ်။

အစည်းအဝေးအတွင်းမှာ ရှီကျင့်ဖျင်က ထိုင်ဝမ်အရေးနဲ့ ပတ်သက်လို့ တရုတ်ရဲ့ လိုလားချက်အတိုင်း မဖြစ်ရင် အမေရိကန်နဲ့ “ ထိပ်တိုက်တွေ့မှုတွေ၊ ပဋိပက္ခတွေ” ဖြစ်လာနိုင်တယ်လို့ ပြင်းပြင်းထန်ထန် ဟိန်းဟောက် သတိပေးခဲ့ပါတယ်။ ထရမ့်ကတော့ ဒီအပေါ်မှာ တစုံတရာ တုံ့ပြန်ခြင်းမရှိဘဲ နှုတ်ဆိတ်နေခဲ့လို့ လေ့လာသူတွေကြား ဝေဖန်စရာ ဖြစ်ခဲ့ပါတယ်။

အီရန်နူကလီးယားကိစ္စနဲ့ ဟော်မုဇ်ရေလက်ကြား ဖွင့်လှစ်ထားဖို့ နှစ်ဦးနှစ်ဖက် သဘောတူခဲ့ကြပါတယ်။ ဒါပေမဲ့ ထရမ့်က အီရန်ရဲ့ ယူရေနီယံတွေကို သိမ်းဆည်းတာဟာ လက်တွေ့ထက် “ နာမည်ကောင်းရဖို့ (PR)” အတွက်ပဲ အရေးကြီးတယ်လို့ မှတ်ချက်ပေးခဲ့ပါတယ်။

ဒီဆွေးနွေးပွဲမှာ ထရမ့်ရဲ့ သားဖြစ်သူ အဲရစ်ထရမ့်အပြင် နည်းပညာသူဌေးကြီး အီလွန်မတ်စ်ပါ ပါဝင်တက်ရောက်ခဲ့တာက ထူးခြားချက်တခု ဖြစ်ပါတယ်။

ထရမ့်က အောင်မြင်တယ်လို့ ပြောနေပေမဲ့ အာရှစတော့စျေးကွက်တွေကတော့ စိုးရိမ်ပူပန်မှုတွေကြောင့် အကျဆင်းဘက်မှာပဲ ရှိနေပါတယ်။ အထူးသဖြင့် တောင်ကိုရီးယားရဲ့ Kospi ညွှန်းကိန်းဟာ ၃.၂ ရာခိုင်နှုန်းအထိ သိသိသာသာ ထိုးဆင်းသွားခဲ့ပါတယ်။

ဒီခရီးစဉ်ကို ခြုံငုံသုံးသပ်ရရင် ထရမ့်ဟာ ရှီကျင့်ဖျင်ရှေ့မှာ အလွန်အမင်း ရိုသေသလို ပုံစံမျိုး ပြသခဲ့ပြီး သတင်းထောက်တွေရဲ့ မေးခွန်းတွေကိုတောင် ရှောင်လွှဲခဲ့ပါတယ်။ ဒါဟာ အရှေ့ဘက်မှာ အင်အားကြီးထွားလာနေတဲ့ တရုတ်နဲ့ အနောက်ဘက်မှာ အင်အားဆုတ်ယုတ်လာနေတဲ့ အမေရိကန်တို့ရဲ့ ပုံရိပ်ကို အထင်အရှား ပြသနေသလို ဖြစ်နေပါတယ်။ ဟောင်ကောင်က ဂျင်မီလိုင်ကို လွှတ်ပေးဖို့ တောင်းဆိုချက်တွေကလည်း ထုံးစံအတိုင်း ဘာတိုးတက်မှုမှ ရှိမလာခဲ့ပါဘူး။

BIV သည် လွတ်လပ်၍ အမှီခိုကင်းသော သတင်းမီဒီယာဖြစ်ပြီး၊ လူ့အခွင့်အရေး၊ တရားမျှတမှု နှင့် ဒီမိုကရေစီ စံတန်ဖိုးများအပေါ် သတင်းစာကျင့်ဝတ်ဖြင့် ရပ်တည်ပါသည်။ BIV ရှင်သန်ရေးအတွက် စာဖတ်သူများ၏ အကူအညီ လိုအပ်ပါသည်။ BIV is an independent media outlet committed to human rights, justice, and democratic values, guided by the highest standards of journalistic ethics. We need your support to sustain our mission.

ဒီမှာ ကူညီပါ SUPPORT HERE