မေလ ၁၇ ရက်၊ ၂၀၂၆ ခုနှစ် | Burma Independent Voice

ပေါ်တူဂီဂန္ထဝင်ကစားသမား ခရစ္စတီယာနို ရော်နယ်ဒို ဟာ ပြီးခဲ့တဲ့ စနေနေ့က ကစားခဲ့တဲ့ အာရှအဆင့်မြင့်ကလပ်ပြိုင်ပွဲ AFC Champions League Two ဗိုလ်လုပွဲမှာ သူ့ရဲ့ ဆော်ဒီကလပ် အယ်လ်နာဆာ အသင်းနဲ့အတူ ဂျပန်ကလပ် ဂမ်ဘာအိုဆာကာအသင်းကို  ၁-၀ ရလဒ်နဲ့ မမျှော်လင့်ဘဲ ရှုံးနိမ့်ခဲ့တာကြောင့် တစ်ပတ်အတွင်းမှာပဲ ဒုတိယအကြိမ်မြောက် အသည်းကွဲစရာ အဖြစ်အပျက်နဲ့ ကြုံတွေ့ခဲ့ရပါတယ်။

၂၀၂၃ ခုနှစ်က ဈေးကြီးပေးပြီး အယ်လ်နာဆာအသင်းဆီ ရောက်ရှိလာကတည်းက ပထမဆုံးသော အဓိက ဆုဖလားကြီးကို သိမ်းပိုက်နိုင်ဖို့ ရော်နယ်ဒိုရဲ့ မျှော်လင့်ချက်ဟာ အခုတစ်ကြိမ်မှာလည်း သက်တမ်းတိုးသွားခဲ့ရပြန်ပါတယ်။ ဒုတိယပိုင်းမှာ အယ်လ်နာဆာအသင်းက တရစပ် ထိုးဖောက်တိုက်ခိုက်ခဲ့ပေမဲ့ ဂျပန်ကလပ်က ခံစစ်အကြိတ်အနယ် ကစားပြီး ခုခံသွားနိုင်ခဲ့တာ ဖြစ်ပါတယ်။

ကင်းဆုဒ်တက္ကသိုလ်ကွင်း ထဲမှာ ပရိသတ်ပေါင်း ၂၆,၀၀၀ ရှေ့မှောက် ယှဉ်ပြိုင်ခဲ့ကြတာဖြစ်ပြီး၊ ဥရောပ ယူရိုပါလိဂ်နဲ့ တူညီတဲ့ အာရှဒုတိယတန်း ဆုဖလားကို အယ်လ်နာဆာအသင်းအနေနဲ့ ပထမဆုံး ဆော်ဒီကလပ်အဖြစ် သိမ်းပိုက်နိုင်လိမ့်မယ်လို့ ရေပန်းစားခဲ့တာပါ။

ဒါပေမဲ့ ပွဲကစားချိန် ၂၉ မိနစ်မှာတော့ ဂမ်ဘာအိုဆာကာအသင်းက အနိုင်ဂိုး ရရှိသွားခဲ့ပါတယ်။ အဲဒီဂိုးကိုတော့ အီဆမ် ဂျီဘာလီ  ရဲ့ ပေးပို့မှုကတစ်ဆင့် ရှေ့တန်းတိုက်စစ်မှူး ဒင်းနစ် ဟမ်းမတ် က ဂိုးဧရိယာအစွန်းကနေ ကန်သွင်းယူခဲ့တာ ဖြစ်ပါတယ်။

“ ကျွန်တော်တို့ သေချာပြင်ဆင်ခဲ့ပေမဲ့ သူတို့က အရမ်းမြန်ပြီး ကျွန်တော်တို့ကို အံ့အားသင့်စေခဲ့ပါတယ်။ ပထမဆုံး မိနစ် ၃၀ မှာ ကျွန်တော်တို့ အကောင်းဆုံးပုံစံ မရခဲ့ပေမဲ့ အဲဒီနောက်ပိုင်းမှာတော့ ပွဲကို စိုးမိုးထားနိုင်ခဲ့ပါတယ်။ သူတို့မှာ အခွင့်အရေး တစ်ကြိမ်ပဲရခဲ့ပြီး အဲဒီကနေ ဂိုးသွင်းသွားတာပါ” လို့ အယ်လ်နာဆာအသင်းရဲ့ ပေါ်တူဂီလူမျိုးနည်းပြ ဂျော့ဂျ် ဂျေးဆု က ပြောပါတယ်။

ပြီးခဲ့တဲ့ ရက်ပိုင်းတုန်းကလည်း အယ်လ်နာဆာအသင်းရဲ့ ဂိုးသမား ဘန်တို  က နာကျင်အချိန်ပိုမှာ ကိုယ့်ဂိုးကိုယ်သွင်းမိမှုကြောင့် ဒုတိယနေရာက အယ်လ်ဟီလာ အသင်းကို ၁-၁ ရလဒ်နဲ့ သရေကျခဲ့ရပြီး၊ ရော်နယ်ဒိုအနေနဲ့ ဆော်ဒီပရိုလိဂ်ဖလားကို စောစောစီးစီး သိမ်းပိုက်နိုင်မယ့် အခွင့်အရေးကို လက်လွှတ်ခဲ့ရပါသေးတယ်။ အကယ်၍ အဲဒီပွဲသာ နိုင်ခဲ့ရင် ရော်နယ်ဒိုအတွက် ပထမဆုံး ဆော်ဒီပြည်တွင်း လိဂ်ဖလားကို ရရှိမှာဖြစ်ပေမဲ့ အခုတော့ ရီယာ့ဒ်မြို့မှာ ၄ ရက်အတွင်း ဒုတိယအကြိမ်မြောက် စိတ်ပျက်စရာနဲ့ ရင်ဆိုင်လိုက်ရတာ ဖြစ်ပါတယ်။

“ အိပ်မက်က နီးကပ်နေပါပြီ။ ခေါင်းမော့ထားကြပါ၊ ကျွန်တော်တို့ နောက်ထပ် ခြေလှမ်းတစ်လှမ်းပဲ လိုတော့တယ်၊ ဒီညရဲ့ အားပေးမှုတွေအတွက် အားလုံးကို ကျေးဇူးတင်ပါတယ်” လို့ အသက် ၄၁ နှစ်အရွယ် ရော်နယ်ဒိုက အယ်လ်ဟီလာနဲ့ပွဲအပြီး ပြီးခဲ့တဲ့ ဗုဒ္ဓဟူးနေ့တုန်းက သူ့ရဲ့ X လူမှုကွန်ရက်စာမျက်နှာပေါ်မှာ ရေးသားခဲ့ပါသေးတယ်။

လက်ရှိမှာတော့ အယ်လ်နာဆာအသင်းဟာ လိဂ်ပွဲစဉ်တစ်ပွဲပဲ ကျန်တော့တဲ့အချိန်မှာ အယ်လ်ဟီလာအသင်းထက် ၂ မှတ်အသာနဲ့ ဦးဆောင်နေပြီး လာမယ့် ကြာသပတေးနေ့မှာ ဒါမက် အသင်းနဲ့ ကစားရမယ့် အိမ်ကွင်းပွဲစဉ်မှာ အနိုင်ရရင် လိဂ်ဖလားကို ဆွတ်ခူးနိုင်မှာ ဖြစ်ပါတယ်။ တစ်ချိန်တည်းမှာပဲ အယ်လ်ဟီလာအသင်းကတော့ အယ်လ်ဖေဟာ အသင်းနဲ့ အဝေးကွင်းမှာ နောက်ဆုံးပွဲစဉ်ကို ယှဉ်ပြိုင်ရမှာပါ။

“ ဒီပွဲမှာ ကျွန်တော်တို့ လိုချင်တဲ့ရလဒ် မရခဲ့ပေမဲ့ ကျွန်တော်တို့အတွက် အရေးကြီးတဲ့ ဆော်ဒီပရိုလိဂ်ဖလား တစ်ပွဲ ကျန်ပါသေးတယ်။ လူပြန်စုဖို့နဲ့ ပြင်ဆင်ဖို့ ၅ ရက်အချိန်ရပါတယ်၊ ဝမ်းနည်းနေဖို့ အချိန်မရှိပါဘူး၊ ရှေ့ဆက်ရပါမယ်” လို့ နည်းပြ ဂျေးဆုက ဖြည့်စွက်ပြောကြားသွားခဲ့ပါတယ်။

BIV သည် လွတ်လပ်၍ အမှီခိုကင်းသော သတင်းမီဒီယာဖြစ်ပြီး၊ လူ့အခွင့်အရေး၊ တရားမျှတမှု နှင့် ဒီမိုကရေစီ စံတန်ဖိုးများအပေါ် သတင်းစာကျင့်ဝတ်ဖြင့် ရပ်တည်ပါသည်။ BIV ရှင်သန်ရေးအတွက် စာဖတ်သူများ၏ အကူအညီ လိုအပ်ပါသည်။ BIV is an independent media outlet committed to human rights, justice, and democratic values, guided by the highest standards of journalistic ethics. We need your support to sustain our mission.

ဒီမှာ ကူညီပါ SUPPORT HERE

.