ဇွန် ၁၇ ရက်၊ ၂၀၂၆ ခုနှစ် | Burma Independent Voice

အာဂျင်တီးနားအသင်းခေါင်းဆောင် လီယွန်နယ် မက်ဆီဟာ ဒီနေ့ဗုဒ္ဓဟူးနေ့မှာ သူ့ရဲ့ သမိုင်းဝင် ဆဋ္ဌမအကြိမ်မြောက် ကမ္ဘာ့ဖလားပြိုင်ပွဲအတွင်းမှာပဲ ကမ္ဘာ့ဖလားသမိုင်းတလျှောက် ဂိုးသွင်းအများဆုံး စံချိန်ကို ပူးတွဲပိုင်ဆိုင်နိုင်ခဲ့ပြီးနောက် ဒါဟာ “ အင်မတန် လှပတဲ့ အခိုက်အတန့်တခုပဲ” လို့ အမွှမ်းတင် ပြောကြားလိုက်ပါတယ်။

အသက် ၃၈ နှစ်အရွယ်ရှိပြီဖြစ်တဲ့ အာဂျင်တီးနား ဂန္ထဝင်တိုက်စစ်မှူးဟာ ကန်ဆက်စီးတီးမြို့က အာရိုးဟတ်ဒ် အားကစားကွင်းမှာ ကစားခဲ့တဲ့ အယ်လ်ဂျီးရီးယားနဲ့ ပွဲစဉ်မှာ အာဂျင်တီးနားအသင်းက ၃-၀ ဂိုးနဲ့ အနိုင်ရရှိခဲ့တဲ့ပွဲအတွင်း ဟက်ထရစ်ဂိုး သွင်းယူပေးခဲ့ပြီး သူ့ရဲ့ ကစားသမားဘဝ မှတ်တမ်းသစ်တခုကို ထပ်မံရေးထိုးနိုင်ခဲ့တာ ဖြစ်ပါတယ်။

ဒီဟက်ထရစ်ဟာ မက်ဆီရဲ့ ကမ္ဘာ့ဖလား သမိုင်းတလျှောက် ပထမဆုံးအကြိမ် သွင်းယူနိုင်ခဲ့တဲ့ ဟက်ထရစ်ဖြစ်ပြီး၊ အခုအခါမှာတော့ သူဟာ ကမ္ဘာ့ဖလားပြိုင်ပွဲ သမိုင်းတလျှောက် စုစုပေါင်း သွင်းဂိုး ၁၆ ဂိုးနဲ့ ဂျာမနီတိုက်စစ်မှူးဟောင်း ကလိုဆေးရဲ့ အများဆုံး စံချိန်ကို လိုက်မှီသွားခဲ့ပြီ ဖြစ်ပါတယ်။

အင်တာမိုင်ယာမီအသင်းရဲ့ ကြယ်ပွင့် မက်ဆီက “ ဒီလိုအောင်မြင်မှုကို ကျနော့်ရဲ့ မိသားစု၊ အမြဲတမ်း ကျနော့်ဘေးမှာ ရှိနေပေးတဲ့ အသင်းဖော်တွေနဲ့အတူ အတူတကွ ဆင်နွှဲခွင့်ရတာ တကယ့်ကို လှပတဲ့ အခိုက်အတန့်တခုပါပဲ။ ကျနော် တကယ် ပျော်ပါတယ်” လို့ ပွဲအပြီးမှာ ပြောကြားခဲ့ပါတယ်။ မက်ဆီရဲ့ ထက်မြက်လှတဲ့ ဂိုးသွင်းစွမ်းရည်ဟာ အာဂျင်တီးနားအသင်းအနေနဲ့ ၁၉၆၂ ခုနှစ်က ဘရာဇီးအသင်းနောက်ပိုင်း ကမ္ဘာ့ဖလားချန်ပီယံဆုကို ၂ ကြိမ်ဆက်တိုက် ပြန်လည်ဆွတ်ခူးနိုင်မယ့် မျှော်လင့်ချက်တွေအတွက် အလားအလာကောင်းတွေ ဖြစ်လာခဲ့ပါတယ်။

မက်ဆီက “ ကျနော်တို့အသင်းဟာ အရမ်းကို စည်းလုံးပြီး အင်အားတောင့်တင်းတဲ့ အုပ်စုတခုပါ။ ကျနော် အခြေအနေကောင်းပါတယ်။ ခက်ခဲတဲ့ ပွဲစဉ်တခုကို အနိုင်ရရှိခဲ့တာ ကံကောင်းပါတယ်။ ပထမဆုံးပွဲစဉ်မှာ အနိုင်နဲ့ စတင်နိုင်ဖို့က အရေးကြီးပါတယ်။ ပရိသတ်တွေကိုလည်း ကျေးဇူးတင်ပါတယ်၊ ဘာဖြစ်လို့လဲဆိုတော့ အာဂျင်တီးနားလူမျိုးတွေဟာ ဘောလုံးကို ဘယ်လောက်ရူးသွပ်သလဲဆိုတာ သူတို့ နောက်တကြိမ် သက်သေပြလိုက်ပြီး အားကစားကွင်းတခုလုံးကို လာရောက်ပိတ်ဆို့ အားပေးခဲ့ကြလို့ပဲ ဖြစ်ပါတယ်” လို့ ဆိုပါတယ်။

တဖက်မှာလည်း အာဂျင်တီးနား နည်းပြ လီယွန်နယ် စကာလိုနီ က “ မက်ဆီရဲ့ အကြောင်းကို ဖော်ပြဖို့ ကျနော့်မှာ စကားလုံးတွေတောင် မရှိတော့ပါဘူး” လို့ ပြောကြားခဲ့ပါတယ်။ စကာလိုနီက မက်ဆီရဲ့ စွမ်းဆောင်ရည်နဲ့ ပတ်သက်ပြီး “ လွန်ခဲ့တဲ့ နှစ်ပေါင်း ၂၀ လောက်ကတည်းက သူဟာ ကျနော်တို့ကို ဒီလိုအရာတွေ မြင်တွေ့ရအောင် အမြဲလုပ်ဆောင်ပေးခဲ့ပြီး သူ့ကို ကြည့်ရှုနေတဲ့သူတိုင်းကို စိတ်ဓာတ်ခွန်အားတွေ ပေးစွမ်းနိုင်သူ ဖြစ်ပါတယ်” လို့ အမွှမ်းတင်ခဲ့ပါတယ်။

နည်းပြ စကာလိုနီဟာ လာမည့် တနင်္လာနေ့မှာ ကစားရမယ့် သြစတြီးယားအသင်းနဲ့ အုပ်စု (J) ဒုတိယပွဲစဉ်မှာ ရှုံးထွက်အဆင့်ကို စောစောစီးစီး တက်လှမ်းနိုင်ဖို့ ပစ်မှတ်ထားနေပါတယ်။ “ ကျနော်တို့က တပွဲချင်းစီကိုပဲ အာရုံစိုက်သွားမှာပါ။ အသင်းကတော့ ပျော်ရွှင်နေကြပြီး ဒီနေ့ပွဲမှာ ကစားသမား အတော်များများကို ကစားသမားဘဝ မိနစ်တွေ ပေးနိုင်ခဲ့ပါတယ်။ မျှော်လင့်တာကတော့ နောက်တပွဲမှာ ထပ်နိုင်ပြီး တတိယပွဲစဉ်မတိုင်ခင် အားလုံး စိတ်အေးလက်အေး ဖြစ်သွားစေချင်တာပါပဲ” လို့ သူက ပြောကြားသွားခဲ့ပါတယ်။

BIV သည် လွတ်လပ်၍ အမှီခိုကင်းသော သတင်းမီဒီယာဖြစ်ပြီး၊ လူ့အခွင့်အရေး၊ တရားမျှတမှု နှင့် ဒီမိုကရေစီ စံတန်ဖိုးများအပေါ် သတင်းစာကျင့်ဝတ်ဖြင့် ရပ်တည်ပါသည်။ BIV ရှင်သန်ရေးအတွက် စာဖတ်သူများ၏ အကူအညီ လိုအပ်ပါသည်။ BIV is an independent media outlet committed to human rights, justice, and democratic values, guided by the highest standards of journalistic ethics. We need your support to sustain our mission.

ဒီမှာ ကူညီပါ SUPPORT HERE