ငွေဆောင်အုပ်စုဟု လူသိများသည့် နိုင်ငံရေးဆိုင်ရာ ညှိနှိုင်းဆောင်ရွက်ရေးအဖွဲ့ (PCB) နှင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့ ၇ ဖွဲ့တို့သည် လာမည့် စက်တင်ဘာလ ပထမပတ်အတွင်း ရန်ကုန်မြို့၌ တွေ့ဆုံဆွေးနွေးရန် စီစဉ်ထားကြောင်း သိရသည်။
အဆိုပါ တွေ့ဆုံမှုသည် လက်ရှိ မြန်မာနိုင်ငံအတွင်း ဖြစ်ပွားနေသည့် ပဋိပက္ခများ ချုပ်ငြိမ်းရေးနှင့် ရပ်တန့်နေသည့် ငြိမ်းချမ်းရေးလုပ်ငန်းစဉ်များ ပြန်လည်စတင်နိုင်ရေးအတွက် ဆွေးနွေးရန် ရည်ရွယ်ခြင်းဖြစ်ကြောင်း အဆိုပါလုပ်ငန်းစဉ်နှင့် နီးစပ်သူများထံမှ သိရသည်။
ပြီးခဲ့သည့် ဩဂုတ် ၁၁ ရက်မှ ၁၄ ရက်အထိ ချောင်းသာ၌ PCB ၏ ၄ ရက်ကြာ ဆွေးနွေးပွဲတရပ် ပြုလုပ်ခဲ့ပြီး အဆိုပါဆွေးနွေးပွဲတွင် ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) ဥက္ကဋ္ဌ ဦးစိုင်းညွန့်လွင်၊ ရခိုင်အမျိုးသားပါတီ ဥက္ကဋ္ဌ ဦးသာထွန်းလှနှင့် ၈၈ မျိုးဆက် ကျောင်းသားခေါင်းဆောင် ဦးမြအေးတို့အပါအဝင် PCB အဖွဲ့ဝင်များ တက်ရောက်ခဲ့သည်။
သို့သော် ချောင်းသာဆွေးနွေးပွဲ၏ အသေးစိတ်အကြောင်းအရာများနှင့် ဆုံးဖြတ်ချက်များကို တက်ရောက်သူများက အသေးစိတ် ထုတ်ဖော်ပြောဆိုရန် ငြင်းဆိုထားသည်။
အဆိုပါ ဆွေးနွေးမှုများတွင် နိုင်ငံတကာ၏ ကူညီပံ့ပိုးမှု ပါဝင်ကြောင်း သိရသော်လည်း မည်သည့်နိုင်ငံ သို့မဟုတ် အဖွဲ့အစည်းများက မည်သည့်ပုံစံဖြင့် ပံ့ပိုးနေသည်ဆိုသည့် အသေးစိတ်အချက်အလက်များကို ထုတ်ဖော်ပြောဆိုထားခြင်း မရှိပေ။
ရန်ကုန်မြို့တွင် တွေ့ဆုံဆွေးနွေးမှုများ ပြုလုပ်ပြီးနောက် နေပြည်တော်တွင်လည်း အလုပ်ရုံဆွေးနွေးပွဲများ ဆက်လက်ပြုလုပ်ရန် စီစဉ်ထားကြောင်း သိရသည်။ ရန်ကုန်ဆွေးနွေးပွဲတွင် PCB အပါအဝင် အခြားနိုင်ငံရေးအင်အားစုများ ပါဝင်မည်ဖြစ်ပြီး နေပြည်တော်ဆွေးနွေးပွဲတွင် စစ်ကောင်စီဘက်မှ တာဝန်ရှိသူများ ပါဝင်လာနိုင်ခြေရှိကြောင်း NCA လက်မှတ်ထိုး ၇ ဖွဲ့၏ ပြောရေးဆိုခွင့်ရှိသူ ဗိုလ်မှူးကြီး စောကျော်ညွန့်က ပြောထားသည်။
ထို့အပြင် PCB အနေဖြင့် အင်ဒိုနီးရှားနိုင်ငံခြားရေးဝန်ကြီးနှင့် တွေ့ဆုံကာ လက်ရှိ မြန်မာ့နိုင်ငံရေးအခြေအနေများကို ဆွေးနွေးရန်လည်း စီစဉ်ထားကြောင်း သိရသည်။ ယခုကဲ့သို့ PCB နှင့် NCA လက်မှတ်ထိုးအဖွဲ့များအကြား ဆွေးနွေးမှုများ ပေါ်ပေါက်လာခြင်းသည် အာဏာသိမ်းအသွင်ပြောင်းအစိုးရက ပြုလုပ်ရန် စီစဉ်ထားသည့် ကြားဖြတ်ရွေးကောက်ပွဲ မတိုင်မီကာလနှင့်လည်း တိုက်ဆိုင်နေသည်။
ထို့ကြောင့် ကြားဖြတ်ရွေးကောက်ပွဲကာလအတွင်း လက်ရှိ မြေအောက်နှင့် မြေပေါ်နိုင်ငံရေးအခြေအနေများကြားတွင် နိုင်ငံရေးပါတီများနှင့် အခြားနိုင်ငံရေးအင်အားစုများ မည်သို့ ပြန်လည်ပါဝင်လာမည်၊ အဆိုပါဆွေးနွေးပွဲများက လက်ရှိ ငြိမ်းချမ်းရေးနှင့် နိုင်ငံရေးညှိနှိုင်းမှုများအပေါ် မည်မျှ သက်ရောက်မှုရှိလာမည်ဆိုသည်ကို ဆက်လက်စောင့်ကြည့်ရမည်ဖြစ်သည်။
About the Author
