အီရန်စစ်ပွဲနှင့် နည်းပညာအရေးများ ဆွေးနွေးရန် သမ္မတ ထရမ့်နှင့် ရှီကျင့်ဖျင်တို့ ဘေဂျင်းတွင် တွေ့ဆုံ

မေလ ၁၄ ရက်၊ ၂၀၂၆ ခုနှစ် | Burma Independent Voice

အမေရိကန်သမ္မတ ဒေါ်နယ်ထရမ့်ဟာ တရုတ်သမ္မတ ရှီကျင့်ဖျင်နဲ့ သမိုင်းဝင်ထိပ်သီးဆွေးနွေးပွဲ ပြုလုပ်ဖို့အတွက် ဒီနေ့မနက်ပိုင်းမှာ ဘေဂျင်းမြို့ရှိ ပြည်သူ့ခန်းမဆောင်ကြီး ကို ရောက်ရှိလာပါတယ်။ ၂၄ နာရီကျော်ကြာမြင့်မယ့် ဒီခရီးစဉ်အတွင်း ကမ္ဘာ့ပဋိပက္ခတွေ၊ နိုင်ငံတကာကုန်သွယ်ရေးနဲ့ AI နည်းပညာရဲ့ အနာဂတ်ဆိုင်ရာ ကိစ္စရပ်တွေကို အရှိန်အဟုန်မြှင့် ဆွေးနွေးသွားကြမှာ ဖြစ်ပါတယ်။

သမ္မတ ရှီကျင့်ဖျင်က ထရမ့်ကို တရုတ်နိုင်ငံရဲ့ ထုံးတမ်းစဉ်လာအတိုင်း စစ်ရေးပြအခမ်းအနား၊ ကော်ဇောနီခင်းပြီး နွေးနွေးထွေးထွေး ကြိုဆိုခဲ့ပါတယ်။ အခမ်းအနားမှာ အမေရိကန်နဲ့ တရုတ်အလံတွေကို ဝှေ့ယမ်းပြီး ကြိုဆိုနေကြတဲ့ မူလတန်းကျောင်းသူ၊ ကျောင်းသားလေးတွေကို ထရမ့်က လက်မထောင်ပြပြီး နှုတ်ဆက်ခဲ့သလို၊ ရှီကျင့်ဖျင်ကလည်း လက်ပြနှုတ်ဆက်ခဲ့ပါတယ်။

ဆွေးနွေးပွဲအဖွင့်မှာ ရှီကျင့်ဖျင်က ၂၀၂၆ ခုနှစ်ဟာ အမေရိကန်ရဲ့ လွတ်လပ်ရေးရတာ နှစ်ပေါင်း ၂၅၀ ပြည့်တဲ့နှစ် ဖြစ်တယ်လို့ ထည့်သွင်းပြောဆိုခဲ့ပြီး အမေရိကန်-တရုတ် ဆက်ဆံရေး တည်ငြိမ်မှုဟာ ကမ္ဘာကြီးအတွက် လိုအပ်တယ်လို့ ဆိုပါတယ်။ ထရမ့်ကလည်း ရှီကျင့်ဖျင်နဲ့ သူဟာ “ ကြာရှည်စွာ သိကျွမ်းခဲ့သူတွေ” ဖြစ်ကြောင်းနဲ့ ရှီကျင့်ဖျင်ဟာ “ ခေါင်းဆောင်ကောင်း တစ်ယောက်” ဖြစ်တယ်လို့ ချီးကျူးစကား ပြောကြားခဲ့ပါတယ်။

“ ကျွန်တော် လူတိုင်းကို ပြောပါတယ်။ ခင်ဗျားဟာ ခေါင်းဆောင်ကောင်း တစ်ယောက်ပါ။ တချို့လူတွေက ကျွန်တော် ဒီလိုပြောတာကို မကြိုက်ကြပေမဲ့ ဒါဟာ အမှန်တရားဖြစ်လို့ ကျွန်တော်ကတော့ ပြောမှာပါပဲ” လို့ ထရမ့်က ရှီကျင့်ဖျင်ကို ပြောဆိုခဲ့ပါတယ်။

ဒီဆွေးနွေးပွဲရဲ့ အဓိက အာရုံစိုက်စရာကတော့ အရှေ့အလယ်ပိုင်း ပဋိပက္ခပဲ ဖြစ်ပါတယ်။ ပြီးခဲ့တဲ့ ဖေဖော်ဝါရီလက ထရမ့်ရဲ့ အီရန်အပေါ် တိုက်ခိုက်မှုတွေကြောင့် ကမ္ဘာ့စွမ်းအင် ထောက်ပံ့မှုတွေ အန္တရာယ်ဖြစ်နေရတဲ့ကိစ္စက နှစ်နိုင်ငံ ကုန်သွယ်ရေးဆွေးနွေးမှုတွေအပေါ် အရိပ်မည်းကြီးလို လွှမ်းမိုးနေတာပါ။ အမေရိကန် နိုင်ငံခြားရေးဝန်ကြီး မာကိုရူဘီယိုကတော့ အီရန်အကျပ်အတည်းမှာ တရုတ်အနေနဲ့ ပိုမိုတက်ကြွတဲ့ အခန်းကဏ္ဍကနေ ပါဝင်လာဖို့ တိုက်တွန်းသွားမယ်လို့ ဆိုပါတယ်။

တရုတ်ဘက်ကတော့ ဒီတွေ့ဆုံမှုကနေတစ်ဆင့် အမေရိကန်နဲ့ ဆက်ဆံရေးကို ပြန်လည်ညှိနှိုင်းပြီး တည်ငြိမ်တဲ့ ကုန်သွယ်ရေးလမ်းကြောင်းတစ်ခု ဖော်ဆောင်ဖို့ မျှော်လင့်နေပါတယ်။ ဒါ့အပြင် ထိုင်ဝမ်အရေးမှာလည်း အမေရိကန်ရဲ့ ထောက်ခံမှုတွေ လျှော့ချဖို့ ထရမ့်ကို ဖိအားပေးသွားဖွယ် ရှိပါတယ်။

ဒီနေ့မွန်းလွဲပိုင်းမှာတော့ ခေါင်းဆောင်နှစ်ဦးဟာ ဘေဂျင်းမြို့ရှိ သမိုင်းဝင် ကောင်းကင်ဘုံကျောင်းတော် ဆီကို သွားရောက်လည်ပတ်ကြမှာ ဖြစ်ပါတယ်။ ထူးခြားချက်တစ်ခုအနေနဲ့ ၂၀၁၇ ခုနှစ် ထရမ့်ရဲ့ ပထမဆုံးခရီးစဉ်တုန်းက တရုတ်အစိုးရဟာ မိုးကောင်းကင် ပြာလွင်နေစေဖို့ စက်ရုံတွေကို ပိတ်ခိုင်းတာမျိုး လုပ်ခဲ့ပေမဲ့ ဒီနှစ်မှာတော့ ဘာမှလုပ်ဆောင်ထားတာ မတွေ့ရပါဘူး။ အခုချိန်မှာ ဘေဂျင်းမြို့ရဲ့ လေထုညစ်ညမ်းမှု အညွှန်းကိန်းဟာ ၁၅၀ ကျော်နေပြီး မြို့တစ်မြို့လုံးကို မီးခိုးမြူတွေ ဖုံးလွှမ်းနေတာကို တွေ့ရပါတယ်။ ဒါဟာ အမေရိကန်သမ္မတရဲ့ ခရီးစဉ်အတွက် တရုတ်က အထူးတလည် ပြင်ဆင်ပေးခြင်း မရှိတော့တဲ့ အချက်တစ်ချက်လည်း ဖြစ်နိုင်ပါတယ်။

BIV သည် လွတ်လပ်၍ အမှီခိုကင်းသော သတင်းမီဒီယာဖြစ်ပြီး၊ လူ့အခွင့်အရေး၊ တရားမျှတမှု နှင့် ဒီမိုကရေစီ စံတန်ဖိုးများအပေါ် သတင်းစာကျင့်ဝတ်ဖြင့် ရပ်တည်ပါသည်။ BIV ရှင်သန်ရေးအတွက် စာဖတ်သူများ၏ အကူအညီ လိုအပ်ပါသည်။ BIV is an independent media outlet committed to human rights, justice, and democratic values, guided by the highest standards of journalistic ethics. We need your support to sustain our mission.

ဒီမှာ ကူညီပါ SUPPORT HERE